ابــــــــــو الجــروس

حسن يوسف

الترتيب والنظام مهم جدا في حياتنا.. الزول بجتهد انه وهو حي علي قيد الحياه انه يترتب قدر الامكان , امس سرحت قلت هسه ياود ياحسن لزوم تصغير السن.. ياود ياسحس لو لا قدر الله اتوفيت كيف بتقدر تحارب الخمج الممكن يحصل في الفراش طالما البكا حقك وانته سيده لازم يكون مرتب يعني مثلا يوم واحد كافي لرفع الفراش واصلو مافي داعي الناس تتكسر وتبقي علينا قصة مولد وصاحبه غايب.. يعني اشتموا الحكومه في صيواني وهلال مريخ تدور ويعرجو لسيرة اردوقان والاقتصاد.. والقفله املو العيال ديون واكون ميت حي مامريحهم ده غير الديانه البجو مبوزين بعد المقلب الشربتهم ليه ههههه منظرهم بكون كيف؟ غايتو ربنا يطول في اعمارنا ونسدد العلينا.. عشان كده قررت اعمل الفراش قبل الوفاه واشرف عليهو بنفسي لانه الكشف مرات بحصل فيهو لعب.. ولما تحصل الوفاه يمشو المقاير ومنها علي اشغالهم..صيوان زاتو مافي داعي ليه.

اي امه تترك القانون جانبا لن تحصد الا الدمار والتلاشي

فنجرب احترام القانون وتطبيقه علي كل منتهك حكومه كانت او معارضه اوشعب

القانون القانون القانون علي الكبير والصغير.. تكمن كل اشكالات البلد في القانون . فقد تعودنا انتهاك القانون وطوالي نجري نشوف عندنا منو بخارجنا وبنسميهو للاسف ود حلال, فاولاد الحلال الله يديهم العافيه بس.

خطرفه صغيره:

التاريخ جميل لمانسرده ونحن نستشرف ابواب المستقبل بس لما طوااالي نقعد نتكلم عن زمان باسهاب وكنا وكنا وكنا اها الان المساله دي في الاونه الاخيره كترت تقعد جمب اي انسان طوالي يسرد ليك زمان كيس العيش ورطل الزيت والطماطم.. في كل مناحي الحياه طوالي زماان وزمان.. طيب الحاضر ده مشي وين؟ ننتظره لامن يبقي ماضي حتي نتجاوب معاه؟