الهتيفة

غدير ميرغنى

بعد السلام والتحايا,والسؤال عن الحال والاحوال جلس عزالدين صديق الطفوله علي الكرسي وهو يقول والله ايام زمن طويل ماشفناك ونظرن لابو العز كما كان يلقب والله ماشاءالله كان جسمه النحيف قد امتلاء واصبح ليهو فقرة وعلعلة اما الكرش فهي باديه للعيان والجيهة والراحه باديه عليه قلت اهة يااحينا تشرب بارد انتفض ابو العز لا ابعدني من اي حاجه فيها تلج..,قلت ليهو شاي ولا قهوه رد لا اي حاجه سخنه برضو بتاثر,قلت بتاثر علي شنو , رد علي الحلقوم والحنجرة قلت ليهو كيف يعني قال لي شوف ياسيدي انا اي حاجه بتاثر علي صوتي وحنجرتي مابتنفع معاي وبضرني يعني عتدك انا هسي ماباكل شطه لو اديتني شنو وشنو وعندك الايسكريم والبارد ومويه التلج يااحي انا التلاجه دي مابذكر جيت جنبها متين بعدين اي حاجه او مشروب سخن شديد برضو ببعد منو,قلت كفارة يااخي الجاك شنو؟ رد الحمدلله ماجاني شي احمد الله, قلت طيب مانعنك من الحاجات دي ليه ,رد مافي زول مانعني انا مانع نقسي عشان طبيعه شغلي بتتطلب كده,قلت ليهو وانت شغال شنو ,قال انا زول هتيف ,نظرت له وانا مندهش.فقال اقعد يااخي نشرح ليك انا اصلا بعد ما سبت المدرسه مالقيت شغل بي سهوله فبدين اشتغل منادي..قلن مندهشا منادي شنو,,قال كمسنجي مافي اللغه اسمها المنادي يعني الزول البتلقاهو بكورك نفرين الثورة وسوق ليبيا علي سته جنيه..والحاج يوسف نفر ده المنادي,اهة وطبعا احوك صوتو وجاعورتو ماشاء الله تجيب الرايح لكن مااستمريت كتير في الشغله دي لم فيني واحد اداري في نادي كبير وعينوني مع مشجعين النادي والحقيقه انا لقيت روحي في الوظيفه دي ,يازول سفر وقروش وعلاقات مع الادارييت واللعيبه وبعدين الاداريين واللعيبه بدفعو لينا الاداريين ايام الانتخابات واللعيبه في التسجيلات والمباريات المهمه,والله منجهة مابعدها منجهة لكن برضو اخوك ربنا مابريدو مشيت لي قدام شويه قول لي كيف؟,وقلت كيف؟ردواحد من الاداريين ديل كان مترشح في حزب كبير قام ساقني ليك معاهو الليالي والندوات السياسيه وهنا لقيت فرصتي وظهرت مواهبي الحقيقيه يازول كنت بنجر ليك هتافات واقود ليك الجماهير بي صوتي ده يازول والله لم اهتف واجعر ليك واهلل لمن تحتار وتامن..اهة قامو صعدوني بعد داك,قلت وانا في قمه الاندهاش صعدوك وين؟رد ابوالعز صعدوني هتيف اساسي للحزب تعرف اي ليله سياسيه او لقاء جماهيري قبال الساوند والكراسي والبلح والفول لازم اتاكدو انو صاحبك حضور ومما يطل المسؤول صاحبك يبداء ليك الهتافات بعدين اخوك بقي خبرة بعرف اخش متين واسكت متين..يعني مما احس بالمسؤول تعب وصوتو نخه اخش ليك هتاف طوالي لحدي مايرتاح شويه واجغم ليهو مويه وباخد نفسو..حتي اسكت يازول والله ماحصل مشيت مناسبه ماجيت خامي,غير حقي الزول البتكلم بغمت لي حقي مضاعف براهو, ده غير العزايم لكن اقول ليك الحقيقه شغل الهواء الفي الميادين ده متعب مازي شغل الصالات والمسارح المغلقه,.والله نحمد الله اخر منجهة وجيهة, تعرف انا هسي داير اعمل لي مكتب ,قلت مندهشا مكتب لي شتو؟رد ابو العز يازول مع الانتخابات دي والله محترفين فرق القمه مابحصلونا والطلب علي كتير فقلت اشوف لي ناس انسقو لي الشغل عشان مااتعب,,نظر الي وضحك واضاف, ماتستغرب يااخينا اسمع اطلب لي كركدي دافي مع جنزبيل لانو بسلك