ترفيه

غدير ميرغنى
للمره التانيه نلتقي وصاحبي سلوم, المرة الاولي كانت سريعه حمد لله علي سلامه العوده بعد غربه طويله, وزحمه البيت والغاشي والماشي وبنات الاهل الجيران البطاقشن, والشفع الكابسين وده ودفلانه ودي بت فلتكان, وماقدرنا نتونس واتواعدنا نتلاقي وندردش مع بعض ,, وهسي كتر خيرو جاني عدييل وبعد الترحيب والكبكبه والبارد البقي يسل الروح جلسنا نتجاذب اطراف الحديث زي مابقولو ,,هويجر وانا اجرجر فيهو..اخرتها قال لي ,يااخي انتو في البلد دي يتقضو وقتكم كيف؟ قلت ليهو كيف يعني؟ قال لي يعني لافي سينما لامسارح لاملاهي لا حفلات لاحدائق مجانيه لا منتزهات لا رحل في النيل الطويل وعريض ده..بس اي زول قاعد قدام الديجتال, وهنا انبريت ليه بالرد يااخي نحن اكتر بلد ممكن تسنمع فيهو وتقضي وقت ممتع مجانا لاقرش لا تعريفه ونرفه ونروح وتصحك ,,استغرب وقال لي كيف؟؟ قلت ليهو اقول ليك واوريك,يااخي الاذاعه والتلفزيون ديل مماتقش عينك من النوم الاقوك بي تصريحان وخطابات المسؤولين والله نحن الواحد فينا يضحك لم يفرفر وكمان مرات بكون عاوز متعه زياده فالواحد بسخي ويبر روحو نمشي علي الساحات والميادين ونلقي الساوند سيستم والمكرفونات والخطابات الماخمج والله الواحد شهر يتبسم بلا سبب..وكمان عندك زيارات الولاة والمعتمدين والمسؤلين والله منعه تموت من الضحك والبهجه خاصه لو علي الهواء يعني بدون مونتاج ..اها كمان الاولاد لم يزهجو الواحد اجيب المنهج واقعد كان مع المدام ولا الاخوان ونقارن والله مرات الا ارشوك بالمويه من كترة الضحك والفرفشه يااخي تصحك في شتو ولا شنو ؟عشان كده بقينا نقسم المنهج لانو الزول لو تابعو كلو الفرحه بتشقو عديل يعني اسبوع الاشياء من حولنا ,,وماتنطط عيونك دي ماده في المنهج ,,ومرة العربي ومرة كده ومرة كده ,,غايتو جنس ترفيه اها الواحد لم يحب اغير بس تفتح قناة اخباريه وتشوف اخبار العالم العربي اوافريقيا بااخي متعه عديل ولو محظوظ تلاقي اجنماع قمه عيييك والله انا مرة من الضحك لمن غمرت كوميديا طن شي عجيب ومذهل زمضحك,,,وكمان لو داير تغير تعال للغناء عندنا ,,الله الله خاصه بناتنا واولادنا الشباب ديل والله من اللبس قبال الواحدة او الواحد يفتح خشمو الايشيلوك شيل من الضحك ولم يغتي الا اجيبو ليك الاسعاف لانو الصحك بشرطك عدييل كده ..اها ياسلوم المتعه الجد كورتنا والله ياسلوم تضحك لمن تتخجي وخلي اللعيبه الجمهور وحالهم اموت من الضحك لا وكمان بجيبو معاهم اعلام وقال اوالتراس متعه كرويه والله..عشان كده الواحد بكون محتاج لتراجيديا ملودراما عشان اتوازن ,,تقوم نمشي علي قناةاوربيه او امريكيه والله نشوف درامتهم وعناهم والمسؤولين عندهم وافعالهم وكلامهم ..جزم الدنيا دي تبقي ليك زي خرم الابرة وتضيق بيك الواسعه وتتنخج بلا سبب ..و الهم والغم يكتلنا عديييل..وطوالي نرجع لي جماعتنا..