اللوترى

الوليد محمد خالد
اسمى عصام استطت ان أحقق احلامى فى بلاد العم سام,ياسلام… بالله شوفو الدنيا دى عجيبة كيف؟,الايام الصعيبة التى عشتها,اصبحت مجرد ذكريات ,ورغم الذكريات المؤلمة الا أن الوطن جميل بى اهلى واصحابى واحبابى (ياوطنى يابلد احبابى فى وجودى اريدك و غيابى) .
والله ياجماعة انا فى امريكا دى تعبت كترت تعب,واكتر حاجة تعبتنى اللغة الامريكية ,اخوكم خطير فى اللغات انجليزى عربى رندوك رطانة انا اتحدث سبعة لغات, لكن الرطانة الامريكية مافيها ابداع ,يااخى انا فى السودان اى خواجة يجى حلتنا ,كانو ناس الحلة بيجونى جارين عشان اناضم ليهم الخواجة,وكنت ارص ليك الانجليزى ده زى رص الطوب ,واتعب ليك الخواجة تعب شديد, وفى النهاية يلفح شنطتة ويبقى مارق,الانجليزى بتاعى ده هو النفعنى فى البلد دى,تعرف لما جو يدونى (اللوترى) عذبتة ليك اللجنة جنس عذاب, فى النهاية رئيس اللجنة قال ليهم: الزول ده جاب اللغة دى من وين ؟خارجونا منه ده كرهنا لغتنا ذاتة,واستلمت الجواز الامريكى ,ومن ساعتها وانا اقدل فى البلد دى ,ماخليت شغلانة مااشتغلتها ,وما منكم مدسة اتبهدلتة فى البلد دى بهدلة شديده , وناضلت والنضال وصل اخوكم الى انى بقيت رأسمالى, وامتلكت شركة حققت نجاحات وارباح كبيرة ,لدرجة انو اليوم جانى خطاب من ديوان الضرائب الامريكى, يطلب منى الحضور لمقابلة اللجنة,بينى وبينكم دخلتنى خوفة ,انا بخاف من ناس الضرائب, من زمن كنت فى السودان,المهم اتوكلت على الحى الدايم ,وقابلت اللجنة ,وكانو ثلاثة امريكان شعرهم ابيض ولابسين بدل ,ومعاهم امريكية حلوه لمن عيونها خضر ,سلمته عليهم بالانجليزى (طبعا حاتتعبونى معاكم فى الترجمة امرى لله حااترجم ليكم) رئيس اللجنة قال لى : اعرفك بمستر مايكل خبير فى مجال الاستثمار ,وهذا مستر جون مدير البنك المركزى الامريكى ,وهذه مس جين مستشارة اقتصادية ,وابتسمت جين ابتسامة ساحرة, وقلبى قال (شح),اللجنة الامريكية سألتنى اسئلة كتيرة,ماهو نوع نشاطك ؟وماهى اسباب الخسارة التى وردت فى الاقرار الضريبى السنوى,وقال لى كبير اللجنة: نحن مجتمعين معاك عشان نساعدك ونتعاون معاك لانك عميل مهم بالنسبة لنا ,انت عندما تدفع لنا الضريبة تساهم فى تنمية الولايات المتحدة الامريكية, بل انك تساهم فى تنمية العالم كله, لان امريكا هى التى تحكم العالم,لذلك نحن حريصون على استمرار عمل شركتك, لانك ستدفع لنا ضرائب ,وتدفع الضرائب بعد تحقيق الارباح,وانت الان حققت خسائر ,لذلك رأت اللجنة ان تجلس معك, و سوف تقوم بدراسة مجال عملك لمعرفة اسباب الخسارة ,وتذليل هذه الاسباب لاستمرارية شركتك ,و نحن على استعداد تام لتمويل شركتك, وهاهو مدير البنك المركزى موجود معنا, وعلى اهبة الاستعداد لتمويلك بالمال الذى تريده,يعنى مستعدين نمنحك قرض من الف دولار وحتى مليون دولار ,تبسمت وقلت ليه انا عاوز مليون دولار ,حاتحل لى كل مشاكلى, وسمعت صوت ينادينى من على البعد : ياعصام أصحى انت اتأخرت على شغلك وتلفونك ده بيضرب من الصباح ,نهضت مفزوعا وقلت ليها: معقول ده كلو حلم ؟ المره دى دايما واقفة لى ذى العارض , لو انتظرت شوية كان استلمت لى مليون دولار ,ردت زوجتى: هو انت شبه الدولار ؟هاك رد على موبايلك ده ,اجاب عصام : الو منو معاى ؟ رد المتصل: معاك ديوان الضرائب انت متأخراتك الضريبية بقت كتيرة ..تدفع ولا نوديك النيابة.