الحوار الغلب شيخو

غدير ميرغنى
مما سمعت بي موضوع الحوار الوطني وانا اتلفت, وقالو لينا وسمعنا قالو انو مادايرين اي اجنبي( كفايه الجوه البلد) وشايف رسلو ناس للخارج للدعوات وللتحانيس والحلايف والطلاقات والاغراءات عشان اخوانا المرطبين بره يدخلو جوه,المحيرني سمعت والله يكضب الشينه قالو اختارو شخصيلت قوميه للحوار ودي حاجه كويسه اصلو التحزب مانفع البلد دي وقدامكم الهلال والمريخ يعني هسي القروش الكتيرة المامعروف جايه من وين كان صرفناها علي الفريق القومي اقلو كان جبنا كاس افريقيا والخبير مازدا ماحرد وساب الفريق ولسه قاعد راجي التلاتات المهم كويس اجيبو شخصيات قوميه لانو خبرتهم ومعرفتهم واسهامهم في البلد دي و تضحياتهم عشانها اكيد بتثري الحوار..لكن سمعت طراطيف كلام قالو (الله يكفينا شر القوالات..انهم اختارو المطربه ندي القلعه ..بعدين ندي دي غنايه ولفت كتير وللسفر فوائد غير ده عينها ملانه ويدها تحمد سيدها لاسرقت زول ، لا دخلت سيخ واسمنت بي اسم منظمه لاجازفت اوباعت ارض مشروع..وكمان قالو اخونا درمه ..عابدين. جزاهو الله خير زول الدافنه .اختاروهو وانا بفتكر ده اختيار صادف اهله تماما ..اقلها اذكر الحكومه والمعارضه انو اخرها كوم تراب ومادوامه وانو وداللحد راجيهم..وسمعت بي ناس تانيين لكن المزعلني وقاصي كبدتي وحارق فشفاشي انا وصاحبي الوليد البتبسم فوق التقول وارث ويعقوب سيد الدكان الجنبنا (جزمت ده المشاكل الحاليها لي ناس الحي الماليه مابتقدرها) وبتول الوداعيه( ودي مرة حسب اقوال نساء الحي..شوااافه ووصافه وعرافه ) ليه نحن مااختارونا ماقلتو قوميه ..ولا المساله فيها خيار وفقوس ولا ده الحوار الغلب شيخو؟
وبمناسبه الشيوخ دي سمعت وشفت قالو شيخ اللمين مع ناس الحوار والله انا شخصيا الموضوع ده عجبني كون ده زول ماساهل وواصل( الله ينفعنا بي جاهو) هو ده مش الزول الضبح التور الاسود والابيض..( الوان مازمبي) والهلال غلب..ياربي شالو الكاس….بعدين اتحيرت انتو الحكومه بتاعتنا دي والله وحسب كلامها الحوار ده حقنا كلنا طيب ونحن عازرينهم مامكن كلنا نشارك لكن كان ممكن برضو نشارك بالرسائل والمسجات وكده وشركات الاتصال معروف دورها الوطني في الحاجات الزي دي وهم والله دايما في الاعياد والمناسبات الوطنيه مابقصرو فما بالك بي حاجه زي الحوار الوطني..بعدين الحوار ده زاتو ماهين فيهو جيل حنتوب ووادي سيدنا وخور طقت (عضمهم قوي شفطو السمن والعسل والدولارات) ولسه قاعدين ,افوت واحد اجي التاني ,ديل لمن كان اوباما في كينيا, والليدي ديانا بترضع ,حكام يهزو ويرزو , وغيرهم يحلم بيها حلم,وقعدت اكورك، تطير بس اكان القي ليك كراكه بتهز فيني قمت مخلوع .لقيت المدام بتهز وتخج فيني قووم قلت ليك مليوون مرة بعد تاكل الفول اتمشي, تصورو ده كاو كان حلم…