بَدُور يا ناس توَصِّفُو ليْ مَحَل العيد!

قيس شحاتة

بَدُور يا ناس توَصّفُو ليْ محل العيد!
محل ألقا الفرَح زاهِي
ومَوشّح بي صَباح باكِر
محل ليل الحنين سهران
معاهو نجيمة بِتذاكِر
يِجيك طيف الحبيب خجلان
يقولّك حاشا ما ناكِر

بَدُور يا ناس توَصّفُو ليْ محل العيد!
زمن كان الزّمن ممهول
و عُود خاطْر العَشَم رويان
زمن كانت خطاوي الشّوق
حنين داخْرِنّو في الوجدان
زمن كان الفرح يا عيد
دموعو وجَيَّتَك.. سِيّان

بَدُور يا ناس توَصّفُو ليْ محل العيد!
محل ما كانت الأحزان
بِنَغْسِلا بالضِّحِك واللّوم
محل كان الجَنا الضكران
بِشُوف أحلامو قبل النّوم
محل كان العريس النّيل
تجَرْتِقو أُمّنا الخرطوم

بَدُور يا ناس توَصّفُو ليْ محل العيد!
زمن كانت نُفوس الناس
سماحْة الكلمة والطِّيبة
زمن كانت عيون الناس
تشُوف جُوّاها ترحِيبا
زمن كانت وُجوه الناس
تَقالْدَك زين.. بَلا رِيبة

بَدُور يا ناس توَصّفُو ليْ محل العيد!
محل.. بعد الشّقا الممدود
بِنوم هَم النّهار مُرتاح
محل كانت خيوط النّيل
نَطَرِّز مِنّها الأفراح
محل نَحَلِف يمين يا عيد
نقول عِشْنا الزّمان الصّاح

بَدُور يا ناس توَصّفُو ليْ محل العيد!

زمن باب الوجع مسدود
وشُبّاك الحِلِم مفتوح
زمن شُوفة الحبيب يا عيد
هِي للمحبوب تَرُد الرّوح
زمن لِسّه الحُزن مكتوم
وما عَلّم جِراحو البوح
بَدُور يا ناس توَصّفُو ليْ محل العيد!

بَدُور يا ناس توَصّفُو ليْ محل العيد!