الكاركاتيرست منعم حمزة يشخبط علي ابواب الوان

ميلاده بعد خروج الانجليز مباشرة ..دبلوم الاخراج التلفزيوني والرسوم المتحركة من القاهرة.. بكلاريوس قسم التصميم الايضاحي من كلية الفنون الجميلة1986.. عمل بمعظم الصحف السودانية منذ عام 94 رئيس تحرير صحيفة قلب الشارع وعدة اصدارات كرئيس تحرير لها قال عنه الفنان الكاريكرست عز الدين عثمان قبل وفاته لإحدى الصحف ان خليفته في فن الكاركاتير في السودان هو عبدالمنعم حمزة .. التقت به (الوان) في القاهرة يوم وصوله من مقر إقامته في الدنمارك وكان هذا اللقاء.

القاهرة: عادل الصول

•…………؟
•الكاركاتير بدأ معي منذ الطفولة فتحنا عيونا على مجلة ميكي وسمير ومن هنا بدأ الاهتمام برسومات الاطفال الساخرة وعند دخولنا للكلية في عهد نميري وانا طالب كنت ارسم الكاركاتير بالليل واعلقه في الكلية من غير توقيع ونميري في عهده تعرض التعليم لهزات كثيرة لذلك كانت تلك اسباب جعلت الكاركاتير يزدهر
•……………؟
•اول ظهور لي واضح في الكاركاتير في فترة الحزبية الثانية عام 1986 في صحيفة الإتحاد وهي صحيفة حزبية وكان رئيس تحريرها دكتور الباقر محمد
•……….؟
•مساحة الكاركاتير في السودان كان يشغل مساحة معينة في الصفحة الاخيرة.. أنا اول سوداني يجعل الكاركاتير من مساحة صغيرة لإصدارة كاملة في السودان ووجدت الرواج لأنها كانت تعبر عن الظرف السياسي في البلد
•…………؟
•في الوطن العربي كله كان هنالك كاركاتير المصرية برئاسة تحرير الراحل مصطفى حسين وفي سوريا (الدومري) السورية رئيس تحريرها علي فرزات .. دي الصحف الوحيدة المتخصصة في فن الكاركاتير.
•…………؟
•فن الكاركاتير يحتاج للحرية.. للاسف مساحة الحرية في السودان ضعيفة ومتقلصة وهذه من أهم اسباب عدم نجاح مثل هذه الصحف.. وهذه الصحف تحولت لما يسمى بصحف التسلية حتى اتهمونا بأننا (نخدر) المواطن وحتى ستات الشاي بقو يحلو الكلمات المتقاطعة!
•…………؟
•تعرضت لمضايقات كثيرة جداً وتم إيقاف صحيفة نبض الكاركاتير عدة مرات ودخلت الحراسة 7 مرات ولا انسى بسبب صديقي الراحل المقيم الفنان صلاح حمادة تم تغريم صحيفة الحرية 8مليون مع الايقاف.
•………..؟
•خرجت من السودان نهاية 2012 كنت آخذ مرتب ولكن شغلي (ما ينزل) واستمر هذا الحال لمدة ثلاثة سنوات.. ودا بالنسبة لزول فنان ورسام كاركاتير لايحتمل لان سعادتي في الدنيا عندما اشوف الكاركاتير في عيون الناس
•……….؟
•كان الهدف من الهجرة ان اعيش في لندن او باريس سعياً وراء الصحافة العربية في النشر لكن غيرت رأي بسبب الاولاد فإكتشفنا ان دولة النرويج افضل دولة لتربية الاولاد من حيث التقاليد كدولة محافظة ويسمونهم (كيزان اوربا) وهي الآن الدولة الاولى في تنمية الموارد البشرية ومجانية التعليم والعلاج والسكن والمواصلات
•…………..؟
•انا اشكو الآن في النرويج من عدم الهموم ومشتاق لدقة الباب بتاعت سيد اللبن.. انا زرت بلاد كثيرة في اوربا ولكن بالنسبة لي كفنان النرويج افضل طبيعة بحيرات وجبال وهؤلاء البشر إنسانين جداً والنرويج تعتبر بلد عزراء.
•…………….؟
•انا الآن ضفدع كبير في بحيرة صغيرة افضل من اكون ضفدع صغير في بحيرة كبيرة!
•…………….؟
•أحب السودان حب ماعادي وحب مستمر وبفتكر اجمل مكان يمكن يعيش فيه الانسان هو السودان وقرار هجرتي كان من اقسى القرارات لكن الاوضاع اصبحت طاردة في السودان وهذه الحرب اللعينة هي سبب دمار البلد وعلى كل الاطراف الجلوس لحل هذه اللآفة المدمرة و بالمناسبة النرويج تسعى سعياً جادا لانهاء الحرب في السودان وهي من اكثر الدول المساهمة لاحلال السلام في السودان
•………..؟
•أن امارس فن الكاركاتير في اوربا الآن صعب نسبة لعامل اللغة وانا ما زلت ادرس اللغة النرويجية لكن بدأت في السعي لعمل كاركاتير لبعض الاصدارات العربية في انجلترا
•…………؟
•تلقيت عروض كثيرة من جرائد سودانية لإرسال كاركاتير ولكن رفضت.. وانا الآن في خانة المتفرج لما يحدث.
•……………؟
•2014 فزت بجائزة الكاركاتير العربي بالدوحة دولة قطر كأفضل رسام للكاركاتير وانا بالنرويج وهذه الجائزة من ضمن 412 عمل فني من كل العالم العربي وشارك من السودان 6 فنانين لكن أنا الوحيد الذي فزت من السودان والحمد لله لأني عايش حالة نفسية هادئة ومستقرة والحمد لله
•…………؟
•بحلم بالرجوع للسودان وارسم الكاركاتير لشعبي وانا عملت سبعة معارض في النرويج بإسم السودان آخر معرض افتتحه عمدة مدينة اوسلو العاصمة السيد/ فابيان استانق وكان الهدف من المعرض دعم الاطفال المشردين في بورتسودان عن طريق الصليب الاحمر الدولية وتم بيع اللوحات وارسل المال الى اطفال بورتسودان بواسطة الصليب الاحمر الدولية.
•………….؟
•أنا المسؤول الثقافي للجالية السودانية بالنرويج (روقلاند) ومعي مجموعة من الشباب نسعى لعمل مركز ثقافي سوداني بالنرويج وسوف تكون هنالك رحلات فنية لفنانين وممثلين وتشكيلين لأن الشعب النرويجي فهمه كله عن السودان قضية دارفور وبفتكرو ان السودان كله حرب ونحن دايرين نبرز وجه السودان الحقيقي المشرق
•…………؟
•معظم المواقف الطريفة بتجي نتيجة جهلنا باللغة مثلاً داير تقول لي زول مساء الخير تقول ليهو شهية طيبة الزول يقوم يندهش وينطط عيونو.. لان اللغة النرويجية صعبة جداً لانها لغة ماعندها قواعد واعراب وهي لغة متداخلة يسمونها اللغة الاسكندنافية.
•…………..؟
•اكثر مايحزنني في السودان الاهمال الواقع على المبدعين وبالنسبة لنا في الغربة اخبار مؤلمة عندما نسمع رحيل مبدع بالاهمال وعدم التقييم له في حياته.
•…………؟
•مشتاق للزملاء الرسامين وتحديداً نادر جني ونزيه وبتمنى نعمل معرض جماعي كما حدث في القاهرة 2012 اتمنى ان نطبق نفس الفكرة في النرويج بأعمال عالمية تعكس الواقع السوداني ومشاكل افريقيا عموماً وتحياتي وامنياتي لهم بكل خير وشكراً لكم في (الوان) لكن انتو عرفتوني جيت الليلة كيف؟ تحياتي لكم جميعاً.